ꀋꋓꀋꉪꇬꆏ，ꉠꑠꀕꂷꑌꒉꌶꅉꇬꄉꅐꇁꃅꐎꉆꈓꐛꂯꄉꀐꅊꇈ。ꎖꌊꐧꌶꅉꋋꂷꇬꄉꂘꃀꄻꌠꑌ，ꃅꈎꃅꆪꋓꉪꀋꁨꃅꃘꈓꇫꈴꁧꀐꅊꇈ。ꀋꉊꂴꈍꃅꉪꑌꂘꃀꂷꄻꇁꎻꀋꈁ，ꃰꊿꋋꑵꐥꐨꌋꆀꐮꆽꀥ，ꉌꃀꁭꅐꉪ，ꐥꐨꁮꐚꑟ，ꉌꃀꄐꎖꄉꌠꉪꐨꌋꆀꐥꐨꐛꐈꐨꐮꐊꇁꀋꄐ。ꑠꃅꄉ2017ꈎ8ꆪ1ꑍꄹꉇꀋꉪꀋꏢꃅꎖꌊꂘꃀꂷꊌ，ꂘꃀꄻꅷꀃꑍꋋꄮꑟ。 ꐥꐨꐛꐈꌠꊿꇫꆼꍅꀋꄐ，ꑠꐛꅹꌗꋏꌗꈻꌊꂘꃀꂷꄻꐺ。ꃰꊿꋋꑵꇣꋲꑵꆹꉬ，ꌤꑞꐘꉫꄿꂿ，ꃅꅷꒉꑲꆏꄡꇗꉫꅉꉬ。ꀃꑍꋋꄮꄡꇗꀋꉊꂴꉢꇬꉨꀋꋻꌠꂘꃀꂷꄻꇬꑌꉢꉜꇬꈩꌒ，ꄷꀋꁧꀋꃉꆏꌌꋍꍂꌤꑘꃅꄉꃅꏾꀐ。ꒉꌶꅉꄯꒉꌶꄮꇬꌌꌐꑘꃅꄉꌷꌠꆏꆀꉙꌷꌠꐛꄉ，ꊿꌌꇫꄉꍗꀳꇬꆏꆀꉙꌧꃀꉬꄷ，ꀊꅰꉪꀊꅰꊽꒉꏾ，ꑠꃅꄉꉡꆏꋌꐛꃅꆀꉙꂘꃀꐛꄉ，ꐧꌷꌕꈎꊐꌠꆀꉙꂘꇬꎷ，ꋋꈍꑋꈓꂘꃀꄻꊂ，ꉪꐨꈍꑋꈨꑌꐥꋺ，ꎭꐪꈍꑋꈨꑌꐥꋺ，ꇨꇅꈍꑋꈨꑌꃃꋻ！ꒈꃚꉏꃚꈍꑋꈨꑌꐥꋺ。ꉌꃀꉪꄉꇬ，ꀋꉊꄹꈎꇯꆐꁱꇐꁬꁱꎼꇀꏢꉪꀐꌠ，ꌤꆿꀋꆷꃛꑠ，ꑡꈨꉢꌌꇬꊎꃅꀋꐚ，ꄮꈉꂷꎹꌊꀉꄂꃅꌐꄉ，ꌌꁱꇐꁱꉠꌶꌺꋋꁥꁵꇬ，ꎹꊋꇨꌠꌡ，ꉌꃀꆄꇓꂷꑌꄉꀃꂰꑟ。ꉜꇈꇁꇬꆏ，ꄮꈉꀋꐥꌠꀋꉬꃅ，ꌶꐞꄮꀋꑟꑴꌦꄉ，ꀋꇊꆏꆍꊇꀉꉘꃅ，ꉠꈭꉠꇍꐥꄉꄯꒉꌷꄎꑴꌦꎼꈁꄉ，ꇇꐛꁱꀙꇬꄀꀋꒉꌠꉬꅊꇈ。ꃅꐎꌕꈎꀋꇊꆏꑓꂨꋍꇅꋏꄷꆏꇫꈴꁧꀐꅊꇈ。ꌕꈎꋋꂷ，ꀁꎴꄷꑌꀁꎴ，ꀁꎴꄷꇬꅽꉪꂘꃀꌷꐋꑠꈨꀋꅔꉇꑲꆀꐯꌥꐮꂿꇁꌠꌡ，ꀉꎴꄷꑌꀉꎴ，ꉘꁮꈍꑋꈞꆈꃹꁧꃯꀋꐚ，ꆧꁨꈍꑋꁧꎐꊰꀋꐚ，ꑊꒌꅍꇬꄉꉜꇬꉠꀑꐎꈧꌠꑌꃷꌐꈤꀋꉆꀐ。ꌷꐋꊇꀋ！ꉪꊇꂘꃀꌶꌺꐯꌥꐮꂿꇬꄮꈉꌕꃏꈁ，ꅸꊇꌷꐋꐯꌥꐮꂿꇬꄮꈉꌕꂷꈁ，ꌶꅉꀊꏀꂷꌌꊨꏦꀁꇬꌠꃅꐤꅉꂷꄻꇬꃅꐎꌕꑍꈁ，ꃅꐎꌕꁮꆪꂷꌌꄉꌶꅉꋋꂷꇬꂘꃀꌷꐋꈧꌠꌧꈴꌐ，ꃅꐎꌕꈎꌌꄉꐞꀋꄚꌠꂘꃀꌷꐋꉂꏣꄻꐛꄉꇬꆏ，ꀋꐞꀋꉆꄮꑟꀐꂼ。ꀃꂰ！ꃅꃴꇬꃅꏸꀋꅑꑠꉔ，ꃅꆳꄡꇗꍠꀕꍠꄹꁏꇁꉠꀀꅉꌍꑓꇬꌸꑴꌦ，ꀋꃋꋋꇅꇬꅸꊇꉬꇮꀀꃅꃹꀐꀞ？ꉡꆹꀀꃅꃹꒉꀋꅲꇬꎸ，ꆍꊇꁰꒌꍑꄉꉠꄆꅇꇬꊐꄉꈧꌠꋍꁬꋑꀋꋒꃅꉢꀖꌌꋍꃢꉜꌥꀐ。ꒈꃚꉏꃚꈨꑌꅳꀧꇬꈨꇁ，ꊨꃚꏇꃚꈨꑌꅳꀧꇬꎟꇁ，ꈮꒆꄿꎟꃅꌠꉠꑓꋪꇬꐛꇁ，ꌓꀖꌓꋓꈩꏸꁏꄉꑓꁴꈘꌠꉠꑓꋪꇬꐛꇁ。ꃅꐎꋋꌕꈎꎺꏣꎵꑳꀕꑠꏢꆍꊇꄻꉠꉌꃀꇬꊐꄉꇈꀐꌠꉬꏭꐛ。ꉢꁱꅸꄚꑟꇬꆏ，ꂿꃅꑌꉌꐡꅀꑞꉬꀋꐚ？ꂷꉐꑰꀕꑰꄹꐛꇁꉠꑳꊂꈶꇓꇬꀒꌸꑟꀐ。ꀋꃋꋋꇅ，ꄮꈉꃅꄜꇁꂯꌕꂷꇄꌠ，ꊂꄮꈉꋍꂷꐥꑲꆏꃬꀮꂇꂯꄉꀐ，ꃅꄜꐛꎴꄷꆏꆍꊇꆹꁱꀙꌌꄉꉌꃀꉪꐨꉜꄉꈹꁧꂯꑴꌦ。ꑠꄮꇬꆏꌶꐞꄮꈉꑌꃛꅉꇀꅉꑟꀐ！ꉡꆹꈍꃅꆍꊇꏃꇫꎭꂯ？ꌷꐋꊇꀋ！ꉠꈯꉢꀋꌅꀐꅊꇈ，ꅽꉪꑠꈨꌶꐞꇈꈭꐨ，ꂿꄮꂿꀋꉆ、ꈩꄮꈩꀋꉆ，ꌧꄮꌧꀋꉆꑴꇬ，ꃰꊿꂶꆏꉌꃀꂷ，ꁬꃷꂶꆏꈝꃀꏢ ，ꈀꄸꑌꐥꐨꊫꂫꁤꇅꀕꌠꉜꄉꂵꇬꎷꑲꆏ，ꈎꌒꆪꌒ，ꑍꌒꉖꌒꑠꋍꑍꆏꐮꂿꇀꎂꀕ。ꐥꌒꄻꌒ，ꈩꌒꀜꌒꑠꋍꑍꆏꐮꂿꇀꎂꀕ。ꄽꂫꉘꇉꌠꆏ，ꄯꒉꁱꂷꄝꇬꄡꎭꅊꇈ，ꃰꊿꀋꌧꏦ，ꀋꌧꌶꆏꇿ。ꏨꆉꐥꅉꐯ，ꂿꇐꌕꑵꐋꄩꎆ，ꆿꅪꐥꅉꐯ，ꋠꇐꌕꑵꐋꄩꎆ，ꆗꌺꐥꅉꐯ，ꃅꇐꌕꑵꐋꄩꎆ，ꀉꐔꐥꅉꐯ，ꋽꇐꌕꑵꐋꄩꎆ。ꋍꑍꌷꌠꒉ，ꄯꒉꇇꁉꊭ，ꌧꇐꁱꂷꀨꇬꄉꑲꆏ，ꃰꊿꈍꄮꈁꉬꀕꌠ。 ꌷꐋꊇꀋ！ꅸꊇꀅꌳꁧ，ꐞꆹꐞꀋꄚꑲꆏ，ꌩꏾꀕꉅꅽꌷꅍꄯꒉꇢꊭꇬꑐꌊꁧ。
2023ꈎ6ꆪ14ꑍ
网友评论
网友评论仅供其发表个人看法，并不表明我司立场
暂无评论
